男燒衣 - 白駒榮

聞得妹你話死﹐我實在見悲傷﹐妹呀你為因何事搞到自縊懸樑﹐人話死咯尚屬思疑﹐我唔信佢講﹐今日你果然係死左咯﹐叫我怎不悲傷 唉妹呀唔望與嬌彈共唱﹐唔望燈前月下共你結呢段鸞凰﹐呢回任得天上跌一個落黎﹐唔慌我重想﹐唉愁有萬丈﹐不若把隻小舟將水陸放﹐ 等你早登仙界直向慈航﹐忙解纜﹐出到江濱﹐祇見江楓漁火照住我愁人﹐各物擺齊兼共果品﹐我願妹前來鑒領我誠心﹐燒頁紙錢珠淚惡忍﹐三杯薄酒奠妹孤魂 燒到童男童女等妹相親近﹐吩咐眾人使喚要聽佢將真﹐大 lung 鎖匙交過你收緊﹐你切莫頑皮激著主人﹐燒到胭脂和水粉﹐刨花兼軟抆﹐簡妝一個照妹孤魂 燒到芽蘭帶﹐與共繡花鞋﹐可恨當初唔好早日帶妹埋街﹐免使你在青樓多苦捱﹐咁好沉香當作爛柴﹐呢條芽蘭帶乃係小生親手買﹐ 可惜花鞋繡得咁佳﹐記得八月中秋同把月拜﹐重話二人衾枕永結和諧﹐點想別離你心事古怪﹐誰知錯意把妹命來晒﹐唉越思越想心痛壞﹐珠淚流唔晒﹐妹呀你便夢中魂魄共我講幾句情­懷 燒到被鋪蚊帳係出在杭州﹐重有香珠一串搭在妹襟頭﹐燒到煙槍煙托與及雷州斗﹐又來燒到個煙屎勾﹐局砂一盞光明透﹐但凡燈暗妹呀你自己添油.  呢盒公煙原本係舊﹐馨香翳膩都解得下煩憂﹐你無事拈來燂佢幾口﹐不防陰府你自己籌謀﹐咁多物件燒來交過你手﹐至緊關防門戶咯莫俾人偷 妹盼你生前所用般般都有﹐今日把火焚燒在水面浮﹐我再酌酒﹐奠妹妝台﹐願妹呀你前來鑑領我一杯﹐等你飲過此杯呢離了苦海﹐早登仙界直上蓬萊 又到艇嫂上前同佢抹淚﹐叫聲大相你切莫悲哀﹐捨得多情愁無多情配﹐奴奴情願共你為媒﹐你既有真心寧守耐﹐等我找尋一個重靚過花魁 人話男人心腸多變改 ﹐但我見君情義真正少人陪﹐臘燭替君流血淚﹐半天仙鶴渡郎追﹐你不如忍淚係埋街去﹐免令今夜你自己痴呆 我忙轉艇﹐就快如雲﹐雲槳齊撓水面奔﹐海闊風狂你須要坐穩﹐等我行埋共你講幾句時聞﹐我地隔鄰有個叫做馮人引﹐真正好品﹐腳又細時滿手芣針 年方二八知書禮﹐詩詞歌賦樣樣皆能﹐舊時有位少爺話同佢上岸﹐ 但要揀個多情人仔至兩相登﹐我問聲大相可否心情允﹐真正妙甚﹐真妙甚﹐等我把鵲橋高駕起等你直上到浮雲。